Landssamband æskulýðsfélaga, LÆF, er heiti á regnhlífarsamtökum fyrir 22 æskulýðssamtök á Íslandi.  Aðildarfélög eru frjáls félagasamtök sem starfa á landsvísu og vinna að hagsmunum og heill barna og ungmenna.

HlutverkLandssambands æskulýðsfélaga er:
-að vera fulltrúi og málsvari ungs fólks gagnvart íslenskum stjórnvöldum.
-að vera samráðs- og samstarfsvettvangur fyrir íslensk æskulýðsfélög.
-að vera fulltrúar íslenskra ungmenna í ýmsu erlendu samstarfi.
-að vera í forystu í umræðu um æskulýðsmál.

Gildi Landssambands æskulýðsfélaga:
Þátttaka ungs fólks í uppbyggingu lýðræðis er einn mikilvægasti hornsteinninn í starfi Landssambands æskulýðsfélaga.  Ungt fólk á að hafa jöfn tækifæri til þess að hafa áhrif á og móta framtíðina.  Til þess að það geti orðið að veruleika þarf að auka þátttöku og hlut ungs fólks í ákvarðanatökum og umræðu um mikilvæg málefni.  Landssamband æskulýðsfélaga hyggst vera í forystu um þessi mál með bjartari framtíð íslenskrar æsku að leiðarljósi.

Fjölbreytni og samheldni eru undirstöðugildi alls æskulýðsstarfs.  Landssamband æskulýðsfélaga telur að víðsýni sé mikilvægur þáttur í farsælu samfélagi og leggur því ríka áherslu á baráttu við fordóma. Jafnframt vinnur það að því að auka jafnræði á  öllum sviðum starfsemi aðildarfélaga sinna.  Landssamband æskulýðsfélaga mismunar ekki og mun aldrei mismuna einstaklingum á grunvelli kyns, trúarbragða, kynhneigðar, þjóðernis, litarháttar eða fötlunar.

Uppbygging Landssambands æskulýðsfélaga:
Æðsta vald í málefnum Landssambands æskulýðsfélaga er sambandsþing.  Sambandsþingið skipa fulltrúar aðildarfélaganna auk stjórnar Landssambands æskulýðsfélaga og á hvert félag samkvæmt núgildandi lögum rétt á þremur fulltrúum til setu á þinginu.

Á Sambandsþingi er kjörin fimm manna framkvæmdastjórn.  Í framkvæmdastjórninni eru því formaður, varaformaður, ritari, gjaldkeri og alþjóðafulltrúi. Framkvæmdastjórn getur skipað vinnuhópa um ýmis málefni og/eða nefndir sem starfa þá á milli Sambandsþinga að ákveðnum málum.

Markmið Landssambands æskulýðsfélega í samskiptum við hið opinbera er:

-að vera tengiliður milli stjórnvalda og æskulýðsfélaga.
-að vera tilnefningaraðili fulltrúa ungs fólks í nefndir, ráð og umræðuhópa um æskulýðsmál á vegum hins opinbera.
-að upplýsa æskulýðsfélög um breytingar og þróun í stefnu stjórnvalda.
-að vera stjórnvöldum innan handar og til ráðgjafar um málefni íslenskrar æsku.

Stærsti hluti fjármögnunar Landssambands æskulýðsfélaga hefur komið frá opinberum aðilum, síðast af fjárlögum undir safnliðnum Æskulýðsmál og þar á undan með stuðningi frá Æskulýðsráði ríkisins og Menntamálaráðuneytinu.  Reikna má með að rúmlega 90% af tekjum Landssambands æskulýðsfélaga komi frá opinberum aðilum auk aðildargjalda félaganna. Þrátt fyrir að meginhluti tekna komi frá hinu opinbera er alveg skýrt að Landssamband æskulýðsfélaga er frjáls og óháður félagsskapur.